شرح "زمن الماضي المستمر" في اللغة الانكليزية للصف السادس الاعدادي - سيف شاكر

هسه راح نبدي بالماضي المستمر 🙄

دقيقه!😳 ..شلون ماضي 😳 وشلون مستمر 😳؟؟؟!! 

تضحك علينه انت؟! 😡 

لاع اصبر افهمك 😒

ماضي معناهة حدث صار بالماضي وهذا شي مبين 

مستمر معناهة مستمر بالماضي لفتره محدده 

اكلك تره لصتهة عليه فهمني اكثر😒

مثلا اني امس جنت اقره انكليزي من ساعه ب ٩ لحد ساعه ب ١١ 

واجيت حظرتك سألتني شجنت تسوي ساعه ب ١٠ ؟🤔. 

اكلك جنت اقره يعني اني مستمر بالقرايه ..يعني اني جنت بنص الحدث الي هو القرايه ..

ف اذا تلاحظ هنا الحدث صار بفتره محدده بالماضي وبنفس الوكت مستمره لان اني ب ١١ خلصت قرايه وانت سألتني شجنت تسوي ب ١٠ القرايه استمرت من ١٠--١١ 😝 ..فهمت😒

زين يابه ميخالف خلي نكول اني هسه فهمت 🙄 اكو قاعده اكدر امشي عليهة ..جهرت هذا زمن شلون صايره😒 اتحفني 

بويه بسيطه شجاك ..قاعدته تكول 

اكو فاعل ؟ ..هذا الفاعل s 

اكو افعال مساعده؟ ..هذني was,were

الفعل شلون تريده؟ ..اريده مستمر يعني بي ing 

S+was,were+v-ing 

هااا😳 ..خوش زين ماعجبني هذا الزمن اريد انفي 😁

 سهله خلي not للافعال المساعده 

Wasn't, weren't 

فهمت😒 لا 😒 

🏃

الخلاصه👇

الزمن الماضي المستمر يحجي عن حدث صار بفتره محدده بالماضي  يعني مثلا 

حدث بده بنقطه a ونتهة بنقطه b بس بالماضي

a...............الماضي المستمر....................b

باع مكان الماضي المستمر وين؟ الحدث بعده ماخالص ..ومستمر بالماضي 

.....

القاعده 

S+was,were+v-ing 

.....

امثله 

I was playing football at7 o'clock last night ⚽️

راح انطي بس هذا المثال لان البقيه من نشرح استخدام الماضي البسيط والمستمر سوه 

.....

نفي wasn't, weren't 

سؤال بس صعد was, were خليهن كدام الفاعل 

اقرو حتى يبقه عدنه بس استخدامهن سوة ونمتحن ان شاء الله 😍😍

جا مادريتو😳😳😳

غير الماضي المستمر تزوج💃🎺

تدرون اخذمن؟ 😌

اخذ while  😍😍 

وخلفو ولد اسمه as😁

وياسبحان الله  الماضي البسيط هم تزوج وهم خلف 💃💃💃

تزوج when ❤️❤️

وخلف بنيه زركه اسمهة and 😒

...

من خلال هذا العرس شفتهمنه؟ 

انو وره while ,as   دائما يجي ماضي مستمر 

وره 

When,and 

دائما يجي ماضي بسيط

لان كلمن ومرته وزعاطيطه😁

بس تدرون عدنه عريس اجكم واكو عريس صاك 

الماضي المستمر هذا طول😌 وضخامه💪 ودائما اول 

الماضي البسيط زقج😒 مدحدح🙄 دائما بالاخير 

شعرفنه من المواصفات 

انو بالجمله اذا اجه حدثين 

ف الحدث الطويل يصير بالماضي المستمر

والحدث الكصير يصير بالماضي البسيط

الخلاصه..

دائما وره while ,as يجي مستمر شلون يعني ..مثال..

While ali was eating,somebody knocked the door 

شوف بس ركزو وره ال while  اجه مستمر يعني باقي الجمله يصير بسيط سواء اجت بنص الجمله while او بالبدايه ف وراهة مستمر as نفس الحاله ..

.....

دائما وره when  ماضي بسيط 

I was eating when somebody knocked the door.

لاحظو جمله وره when ماضي بسيط والي كبلهة ماضي مستمر 

.....

لاحظ بالامثله الي فوك انو المستمر دائما حدث طويل والي بالبسيط هو حدث عارض 

يعني عمليه الاكل عمليه طويله بس دكت الباب حدث عارض صار واني اكل 

...

خلصنه ذني الازمنه وراح امتحنكم بيهن

مستعدين... الاسئلة راح ادزهة 

كبل لا تجاوبون .. اريد تسوون الاتي 

لاكبل تحل اقرة السؤال وفكر بي 

اكو اسئلة فكيتهة بالاحداث 

اكو اسئلة فكيتهة بالادوات 

جاوبو بهدوء وحتى لو غلط .. الغرض نتعلم ونحلهن سوة بعدين

الاسئلة 

1) What  (you/do) when I  (call) you last night?

2) I  (sit) in a cafe when you  (call).

3) When you  (arrive) at the party, who  (be) there?

4) Susie  (watch) a film when she  (hear) the noise

5) Yesterday I  (go) to the library, next I  (have) a swim, later I  (meet) Julie for coffee.

6) We  (play) tennis when John  (hurt) his ankle.

 7) It   (be) a day last September. The sun  (shine) and the birds  (sing) . I  (walk) along the street when I  (meet) an old friend.

هذني اريد تحطون الزمن الصحيح للفعل .. مستمر لو بسيط

راح انزل الحل وشرح كل نقطة تابعو وياي ..

كملو حل اللي جاي يحلون

الاجوبة 

1) What  (you/do) when I  (call) you last night?

كلنه نشوف الجمله اكو when يعني وراهة ماضي بسيط ..اذن الكدامهة ماضي مستمر ف اغلب الي اجتي ينسون الفعل المساعد او يخلو وره الفاعل ليش؟ الحل يصير 

What were you doing,when i called you 

لاحظو المستمر بي ing وفعل مساعد والبسيط فقط تحويل صيغه الفعل

2) I  (sit) in a cafe when you  (call).

شوف هنا نفس النقطه الاولى 

I was sitting when you called

3) When you  (arrive) at the party, who  (be) there?

شوفو هنا اكثر الاخطاء الي اجت هي ويه فعل be  كلنه هذا الفعل وين ماتلكه تحوله لفعل مساعد ليش اغلبكم ضايفيله ing او محولي فعل مساعد وراجع ضايفله ing  

When you arrived,who was there 

Was لان مفرد من ترجمهة تطلع عندك مفرد 

عندما وصلت للحفله .من كان هناك؟

4) Susie  (watch) a film when she  (hear) the noise

هاي هم بسيطه اكو when  

ف الحل ع سريع ماعدنه وكت  

Was watching , heard

5) Yesterday I  (go) to the library, next I  (have) a swim, later I  (meet) Julie for coffee.

هاي الي اغلبكم خطأ بيهة مع الحل الحل مالتهة بدايه الجمله ..كايلك yesterday  يعني كل الاحداث الي صارت وارهة هي بالماضي البسيط ..

وبعدين have  ليش تحطولهة ing?  مايصير 

Went,had,met

6) We  (play) tennis when John  (hurt) his ankle.

 هاي هم بسيطه مايحتاجلهة شرح 

Were playing ,hurt

7) It   (be) a day last September. The sun  (shine) and the birds  (sing) . I  (walk) along the street when I  (meet) an old friend.

هاي الي سببت ارق لنصكم 😂 

تره هاي ٩٠٪ ع المعنى ولاتخافون بسيطه 

اول فعل was  ليش لان وين مانلكا نحوله فعل مساعد 

ثانيه  was shining 

اذا اسويهة ماضي يعني حدث صار بالماضي وانتهة وفاذا تكمل جمله للاخير تشوف كل هن ذني صارن وهو يمشي يعني كلهن مصاحبات لفعل المشي يعني احداث طويله 

Were singing 

Was walking 

راح تكلي اكو and هنا اكلك المعنى اقوى من ادات الربط 

Met 

الاخيره لان هذا كبله when  وهو حدث قصير يعني قابلت صديق

الاخطاء الي ممكن يقع فيها الطالب

احنه ابد مانستعمل تصريف ثالث 

نستعمل حالت الفعل بالماضي ف اغلبكم شفته حاط تصريف ثالث 

احفظ الجدول 

اغلبكم يخلي للفعل ing  ومايخلي فعل مساعد وهذا خلل بالقاعده 

الماضي البسيط مابي اي فعل مساعد ومايصير اخلي did  وره when 

لان when ,while ادوات ربط هنا مو سؤال 

...


اسئلة وملاحظات اخرى

راح نبدي بس خلي انطيكم شكم ملاحظه تفيدكم حتى ماتوكعون بالاخطاء .👇👇

طب للغرفه نوب شغل الضوة نوب كعد ع الحاسبه نوب فتح فيس .. 
هيج حدث يسمو واحد وره الثاني بالماضي يعني بالتسلسل صارن هنا استعمل الزمن الماضي البسيط .امس النقطه الخامسه اذا تذكروهة ..
.....
اكو شكم فعل اغلب الاحيان تستعمل ويه الماضي البسيط

 افعال الحاله state 
Be,cost,fit,mean,suit 

افعال التملك possession 

Belong,have 


افعال الحس او الحواس senses 
Feel,hear,see,smell,taste,touch

افعال الشعور feeling
Hate,hope,like,love,prefer,regret,want,wish


افعال العقليه brain work
Believe,know,think,understand 


الاسئلة

1-Martha (turn)  off the lights and (go)  to bed.
2-My father (come)  in, (look)  around and (tell)  me to tidy up my room.
3-The thief (sneak)  into the house, (steal)  the jewels and (leave)  without a trace.
4-I (fall)  asleep while I (watch)  TV last night.
5-I (have)  dinner when I suddenly (hear)  a loud bang.
6-When her train  (get) to the station, we   (wait) on the platform.
7- At 7pm yesterday, we  (listen) to music.
8-On holiday we  (visit) Rome,  (see) the Vatican, and  (spend) a few days at the beach.



الحلـــــــــــول

1-Martha (turn)  off the lights and (go)  to bed

من اكثر الجمل الي غلطو بيهة الطلاب ومسويهة ماضي مستمر ..

الغلط منين اجة كبل شافو اكو  and  

طبقو القاعدة بدون مايقرون الجملة

اقرة الجملة ع كيفي افتهم شنو السالفة يجوز المعنى يجوز فد حالة شاذة 

هسة هنا كلنة بالملاحظة الفوك انو الاحداث اذا صارن بالتسلسل شي ورة شي 
one after another  

يعني بالماضي البسيط كلهن .. ليش ؟؟ ..لان كلهن صارن بنفس الفترة وخلصن 

هسة هاي الجملة تكول هاي البنية مدري شسمهة 

طفت الضوة نوب راحت للجرباية 

ف اكيد بالماضي لان هي جت سوتهن بالسرة طفت الضوة نوب راحت للجرباية


Martha turned off the lights and went to bed.

----------------------------

2-My father (come)  in, (look)  around and (tell)  me to tidy up my room.

هاي هم مخليهة بالماضي المستمر .. مع العلم نفس الملاحظة تنطبق عليهة 😐🔫

الاحداث بالتسلسل 

طب للغرفة الحجي باوع منا منا كللهة نظفي غرفتج خالة 
😒

طب نوب باوع نوب حجة 

My father came in, looked around and told(me to tidy up my room.

------------------------------------

3-The thief (sneak)  into the house, (steal)  the jewels and (leave)  without a trace 


كذلك نفس القاعدة ونفس الملاحظة 

طب الحرامي نوب خمط نوب فلت 

هي هاي معناهة (نوب) يعني احداث متسلسلة 

The thief sneaked into the house, stole the jewels and left without a trace.

-----------------------------------


4-I (fall)  asleep while I (watch)  TV last night

هاي هنا قاعدة while  تشتغل 

اول شي الحدثين بيهن تفاوت بالطول (واو باع كلمة تفاوت ) واحد بيهن مستمر واجة حدث ثاني كطعه او صار خلالة 

اني جاي اباوع تلفزيون 

جااااي اباوع 

واني جاي اباوع تلفزيون نمت 😐😱 


I fell asleep while I was watching TV last night.

------------------------------------

I (have)  dinner when I suddenly (hear)  a loud bang.

اغلبهم كالو نمشي ع القاعدة have  هنا مايصير تجي الة ماضي بسيط .. هووووووووووووووووووب 🙌🙌 


احنة كلة have  اذا اجت ك فعل تملك ف اغلب الاحيان اكدر استعملهة بسيط 

بس دقرة الجملة يكول have dinner  جاي ياكل ..يأكول (ع اساس فصحة )😁 

دشوفون كلمة suddenly  هاي ام الخبزة .. هاي معناها فجأة 

من علامات البسيط يعني واني جاي اكل سمعت شلون نكول امممم يابطل يكدر يجيبلي معنى bang  بدون مايستعمل كوكل 😌 من الجملة 😐 

المهم ف يكول فجأة سمعت هل ... يعني الحدث صار فجأة


I was having dinner when I suddenly heard a loud bang

------------------------------

When her train  (get) to the station, we   (wait) on the platform.

بسيطة اكو when  والجملة حدث طويلة وقصير 

ف نحلهة ع السرعة ماكو وكت 

got,were waiting

-------------------------------

7- At 7pm yesterday, we  (listen) to music.

تعالو  شوية بالله خلي نرجع بالزمن  .. تذكرون من كلتلكم جنت اقرة انكليزي امس من 9 ل 11 

واجة واحد غثيث سألني شجنت تسوي ب 10 ؟؟ 

شجان جوابي ؟؟؟ ها؟؟

عفيييية جان جوابي ماضي مستمر لان اني بنص الحدث 

هنا نفس الحالة 

were listening  .. ماطول محدد فترة زمنية بالماضي ف استعمل الماضي المستمر ..

وصلت😒🔫

--------------------------------


8-On holiday we  (visit) Rome,  (see) the Vatican, and  (spend) a few days at the beach.


نفس قاعدة النقطة الاولى والثانية والثالثة 

احداث متسلسلة وحدة ورة الثانية 
قاعدة (نوب) سموهة 😂

visited
saw
spent

--------------------------------

هسة الاخطاء الي لحد الان توكعون بيهة والي اكتشفنة شكم خطأ جديد 

كلنة الماضي المستمر هو الي ويا الافعال المساعدة 

تجي تخلي للماضي البسيط was  وwere  ليش ؟؟ الله واكبر عليك 😂 


am ,is,are  مايشتغلن هنا يعني مايصير iam  لان هذا ماضي .. was ,were  فغط 👍

لاتحل كبل الجملة اصفنلهة شوية شوراك طاير منو يركض وراك ..

.
هسة اريد رايكم بالاسئلة اليوم وشرحهن فهمتو لو لا 😁 .. وتصبحون ع الف خير .. نلتقي بالحلقات القادمة .

cut ,cut,cut 


اذا لاحظتو cut  هذا هو تصريف ثالث وهو ماضي وهو فعل مجرد يا اخي افيض قواعد من كل مكان 😂باي لاننبسط 😁

مواضيع ذات صلة

شرح "زمن الماضي المستمر" في اللغة الانكليزية للصف السادس الاعدادي - سيف شاكر

4/ 5

Oleh مدونة ملازمنا

مدونة ملازمنا